الله يستر مـن صواديـف الايـام
لاتبين المكنـون غصـبٍ عليّـه
همي كبير وشايله صبـر والـزام
ماحدٍ درى به كود نفسي الشقيّـه
صابر على سود الليالـي ولاانـام
الا بعـد ضيقـه وحـزن واذيّـه
اصحى بعد نومي على ذيك الاوهام
وارجع وانام وداخل القلـب كيّـه
عشرين عمري فوقها سبعة اعوام
وكني كبير السن نفسـي رضيّـه
حالي كما حال الذي وقت الاعـدام
تذرف دموعه حزن فرقـا خويّـه
كانوا مثل الاخوان بينون الاحـلام
والـي بيديهـم بينهـم بالسويّـه
بس الزمن يحكم وحكمه غدا سام
على الـذي وافـة خويّـه منيّـه
جته المنيّه حـزة الفجـر قـدام
يـذن أذان الفجـر كبـر البليّـه
وجاه الحكم باعدام بافعـال ظـلاّم
وحاول يبري النفس من كل سيّـه
واكبر مصيبه كلهم كانـوا ايتـام
مابه بني عـمٍ تعـرف الجريّـه
مابه جماعه مابه اخوال واعمـام
تاقف تقول فـلان مالـه خطيّـه
حالي غدا مثله وانا الي ماينضـام
راضي بمـا يكتبـه رب البريّـه
دامي على عسر المواقيف ضرغام
ماهمنـي ماصـار لـي مقدريّـه
كتبت انا الابيات من ضيق باقـلام
تكتـب حبرهـا دم نزفـه يديّـه
تشهد لها الاوراق مـن مبـع الآم
ينبع بها القلب الشقـي بالعشيّـه